සන්නිවේදන නිර්වචන

 සන්නිවේදනය පිළිබඳ නිර්වචන

සන්නිවේදනය පිළිබඳ ව මුලිත අවබෝධයක් ලැබීමට ඒ සම්බන්ධයෙන් ඉදිරිපත් වී ඇති නිර්වචන ඉතා ප්‍රයෝජනවත්ය. විවිධ විද්වතුන් හා අයතනික සංවිධාන මගින් ඉදිරිපත් කර ඇති සන්නිවේදනය පිළිබඳ නිර්වචන අතර සාම්‍යයක් දක්නට නොලැබුණ ද ඒවා මඟින් ඉදිරිපත් කෙරෙන මූලික සාධක පිළිබඳ ව අවධානය යොමු කිරීමෙන් සන්නිවේදනය සම්බන්ධයෙන් වඩාත් අර්ථවත් විවරණයක් සපයා ගත හැකි වේ.

සන්නිවේදනය පිළිබඳ හැරල්ඩ් ඩී. ලැස්වෙල්ගේ (Harold D 1 asswell) නිර්වචනය - 1948

"යම් කිසිවෙකු යම් කිසිවත්, කිසියම් නාලිකාවකින් යම් කිපිවෙකුට කිසියම් බලපෑමක් කිරීම සදහා ප්‍රකාශ කරනු ලබන දෙය සන්නිවේදනය යි"

සන්නිවේදනය පිළිබඳ ෂැනොන් සහ වීවර්ගේ නිර්වචනය (Shannon and Weaver) 

''සන්නිවේදනය යනු යම් තැනක දී නිර්මාණය කර ගත් තෝරාගත් පණිවිඩයක් ඒ ආකාරයෙන්ම හෝ ඊට සමාන ලෙස වෙනත් තැනක දී ප්‍රතිනිර්මාණය කිරීමයි"

* සන්නිවේදනය පිළිබඳ විල්බර්ශ්‍රාම්ගේනිර්වචනය - 1954 ( Wilbur Sehrarim)

"තොරතුරු ගැමි වූ සංඥාවක් කරණ කොට ගෙන දෙපාර්ශ්වයක් අතර එක හා සමාන

චිත්ත ස්වභාවයක් ඇති වීම සන්නිවේදනය යි"

සන්නිවේදනය පිළිබඳ වාල්ස් කුලීගේ නිර්වචනය " (Charles Hortiti Coley) 

" මානව සම්බන්ධතා රඳවා සිටින්නා වූත්, වර්ධනය කරන්නා වූත්, සියලු සංකේත මෙන් ම, ඒවා දේශයෙන් දේශයට ප්‍රවාහනය කිරීමටත්, කාලයේ බැඳුම්වලින් ඔබ්බොට ගොස් සුරක්ෂිත කර ගැනීමටත් උපකාරි වන උපක්‍රම සන්නිවේදනය යි."

ඔක්ස්ෆර්ඩ් ශබ්දකෝෂයේ නිර්වචනය

"අදහස, දනුම යනාදිය භාෂණය හෝ ලේඛනය හෝ සංඥා මගින් ප්‍රදානය කිරීම, ප්‍රකාශ කිරීම හෝ හුවමාරු කර ගැනීම සන්නිවේදනය යි"

සටහන : සචීරා සත්සරණි 

ජන සන්නිවේදන අධ්‍යයන අංශය 

කැළණිය විශ්වවිද්‍යාලය 

සන්නිවේදනයේ මූලිකාංග

 *සන්නිවේදකයා

තවත් පාර්ශ්වයක් සමග අතරතුරු, අදහස්, මත, ආකල්ප ආදිය හුවමාරු කර ගන්නා තැනැත්තා සන්නිවේදකයා ය.පුද්ගලයෙකු පමණක් නොව අවස්ථානුකූ ව කණ්ඩායමක්, සංවිධානයක්, ආයතනයක් වුව ද සන්නිවේදක ස්ථානය නියෝජනය කළ හැකි ය. සන්නිවේදන ක්‍රියාවලිය පිළිබඳ සැලකිය යුතු මට්ටමක පාලනයක් කිරීමේ හැකියාව, සන්නිවේදකයා සතු වේ.

*ආකේතකරණය 

සෑම සන්නිවේදන ක්‍රියාවලියක දී ම සිදු වේ. මෙය මානව සන්නිවේදනය ඇසුරින් තේරුම් ගැනීම පහසු වේ. අපගේ සිතේ ඇති වන අදහස්, හැඟීම් තව අයෙකු හා සන්නිවේදනය කිරීම සඳහා සංකේත උපයෝගී කර ගනිමින් සන්දේශ බවට පරිවර්තනය කළ යුතු ය. මෙම ක්‍රියාවලිය ආකේතකරණය යි.

* සන්දේශය

සන්නිවේදකයා අනෙක් පාර්ශ්වය සමඟ හුවමාරු කර ගන්නා තොරතුර සන්දේශය යි. එය අදහසක් මතයක් ආකල්පයක් වැනි විවිධ ස්වරූපයක් ගැනීමට ඉඩ තිබේ. පණිවිඩයක් හැමවිට ම සංකේත ඇසුරින් ගොඩ නැඟේ. සංකේත යන්ත වචන, ශබ්ද, වර්ණ, හැඩ රුව ආදි වශයෙන් විවිධාකාර විය හැකි ය. ඒවා තෝරා ගැනීම පරිස්සමෙන් පිදු කළ යුතු වෙයි. මත් ද, සංකේත වැරදුණහොත් පණිවිඩය ද වැරදීමට ඉඩ ඇති හෙයිනි.

* නාලිකාව /මාධ්‍යය

සන්නිවේදක ස්ථානයේ සිට අපේක්ෂිත පාර්ශ්වය වෙත සන්දේශය ගෙන යනු ලබන්නේ නාලිකාව මඟිනි.සාමාන්‍යයෙන් එදිනෙදා සන්නිවේදනයේ දී භාවිත කරන නාලිකා වන්නේ පංචේන්ද්‍රිය යි. ඒ අතරින් ඇස (දැකීම) සහ කන (ඇසීම) බහුල ලෙස යොදා ගැනේ. තාක්ෂණයේ ආගමනයත් සමඟ මෙකී තාලිකා මාධ්‍ය වල සිදු ව ඇති පරිවර්තනයන් හඳුනා ගැනීම අතිශය වැදගත් වේ.

*ග්‍රාහකයා

සන්නිවේදකයා විසින් සිය සන්දේශය හුවමාරු කර ගැනීමේ අපේක්ෂාව ඇති වී එය ඉදිරිපත් කරනු ලබන්නේ කවරකු වෙත ද ග්‍රාහකයා යි. ග්‍රාහකයන් විශාල ප්‍රමාණයක් ඇති විට ඒ හැම දෙනා ග්‍රාහක ක්ෂේත්‍රය ලෙස හඳුන්වනු ලැබේ. සන්නිවේදන ක්‍රියාවලියෙහි දී ග්‍රාහකයා ද පන්නිවේදකයා හා සමාන වැදගත් බවත් උසුලයි.

*විකේතකරණය

සියලු සන්නිවේදන ක්‍රියාවලියන්හි දැකිය හැකි වේ. මෙය මානව සන්නිවේදනය ක්‍රියාවලියේ දී සිදු වන ආකාරය විමසා බැලීමෙන් පැහැදිලි කරගත හැකි ය. අප වෙත ලැබෙන සන්දේශයක් සමන්විත ව ඇත්තේ සංකේතවලිනි. එම සංකේතවලින් කියවෙන දේ අවබෝධ කර ගැනීම සඳහා සංකේත අර්ථකථනය කර ගත යුතු ය. එසේ ඉදිරිපත් වන සන්දේශයෙහි අන්තර්ගත සන්දේශ අර්ථකථනය කර එමඟින් ඉදිරිපත් කෙරෙන අර්ථය අවබෝධ කර ගැනීමේ ක්‍රියාවලිය විකේතකරණය ලෙස හැඳින්වේ.

* ප්‍රතිපෝෂණය

සන්නිවේදකයා සන්දේශයක් ලබා දුන් පසු ග්‍රාහකයා ඒ සම්බන්ධයෙන් සන්නිවේදකයා වෙත ලබා දෙන නිරික්ෂණය කළ හැකි ආකාරයේ ප්‍රතිචාරය හඳුන්වත්තේ ප්‍රතිපෝෂණය යනුවෙනි. සන්නිවේදන ක්‍රියාවලියේ සාර්ථකත්වය සම්බන්ධයෙන් ප්‍රතිපෝෂණය අතිශ ප්‍රයෝජනවත් ය. ලැබෙන ප්‍රතිපෝෂණයට අනුව සන්නිවේදයේ ගුණාත්මක බව තවදුරට ඉහළ නංවාලීමට අවශ්‍ය වන පියවර ගත හැකි වේ.

තව ද ප්‍රතිපෝෂණය ධනාත්මක හෝ සෘණාත්මක විය හැකි අතර ප්‍රතිපෝෂණය ලැබීමට ගත වන කාලය අනුව එය ක්ෂණික හෝ ප්‍රමාද ප්‍රතිපෝෂණයක් ලෙස හඳුනා ගැනීමට පුළුවන.

*ඝෝෂා/ බාධක

සන්නිවේදක ස්ථානයේ සිට ග්‍රාහක ස්ථානය දක්වා සන්දේශය සම්ප්‍රේෂණය වීමේ දී ඊට අවහිර වන ලෙස මැදිහත් වන ඕනෑම තත්වයක් ඝෝසාවක් හෙවත් බාධාවක් ලෙස හැඳින්වේ. ප්‍රධාන බාධක වර්ග දෙකකි. 

01)මාධ්‍ය බාධක 

නාලිකාව හා සම්බන්ධ බාධක ( නාලිකාවේ හෙවත් මාධ්‍යයේඇති වන දෝෂ සහගත තත්ත්වයන් නිසා ඇති වේ)

02)අර්ථ බාධක - සන්දේශයේ අර්ථය හරි හැටි ග්‍රහණය කර ගැනීමට නොහැකි වන විට උද්ගත වේ.

ඉහත සඳහන් ප්‍රධාන බාධක ඝෝෂා වර්ග දෙකට අතිරේකව තවත් කිහිපයත් සමහර පෙළ පොත්වල ඇතුළත් ව තිබේ. ඒවා නම් පාරිසරිකබාධක, තාක්ෂණික බාධක,මානසික බාධක ආදිය යි. මේවා ද බොහෝ විට ඉහත සඳහන් ප්‍රධාන බාධක වර්ගවලින් එකකට අයත් වේ.

* අත්දැකීම් පසුතලය

පුද්ගලයා සතු පූර්ව අත්දැකීම් සමූහය මෙමඟින් අදහස් කෙයර්, සන්නිවේදක ග්‍රාහක පාර්ශව අතර සමාන ආකාරයේ පූර්ව අත්දැකීම් වැඩි ප්‍රමාණයක් ඇති විට සන්නිවේදන කාර්ය පහසු වේ.

*සන්දර්භය

මෙමගින් අදහස් කෙරෙන්නේ අදාළ සන්නිවේදන ක්‍රියාවලිය සිදු වන්නා වූ වටපිටාව යි. සන්දර්භය පැහැදිලි ලෙස ම සන්නිවේදන ක්‍රියාවලිය මත බලපෑම් ඇති කරයි. හොඳ සන්නිවේදකයෙක් හැම විට ම සිය සන්නිවේදනය ඊට පාදක වන සන්දර්භයට උචිත ලෙස සකස් කර ගනියි. මෙසේ ඊට අනුගත නොවීම විවිධ සන්නිවේදන ගැටලුවලට හේතු විය හැකි ය.

*බලපෑම

සෑම සන්නිවේදනයක් ම කිසියම් බලපෑමක් ඇති කිරීමේ අපේක්ෂාවෙන් සිදු කෙරේ. එකී බලපෑමේ ස්වභාවය විවිධාකාර වන්නට පුළුවන. වරෙක එය ආකල්පමය හෝ චර්යාමය හෝ වෙනසක් ඇති කිරීම ඉලක්ක කර සිදු කරන සන්නිවේදනයක් විය හැකි අතර ලාභය වැනි මූල්‍ය ප්‍රතිලාභයක් අරමුණු කර ගත හැකි ය. කෙසේ නමුත් සන්නිවේදන ක්‍රියාවලියේ සාර්ථකත්වය තීරණය වන්නේ අපේ හිත බලපෑම සාක්ෂාත් කර ගත්තේ ද යන්න මත යි.

සටහන :සචීරා සත්සරණි 

ජන සන්නිවේදන අධ්‍යයන අංශය

කැළණිය විශ්වවිද්‍යාලය 

සන්නිවේදනයෙහි ස්වභාවය

 සන්නිවේදනයෙහි ස්වභාවය

*සන්නිවේදනය අරමුණු සහගත ය.

අප ඕනෑම අවස්ථාවක දී සන්නිවේදනයේ යෙදෙන්නේ කිසියම් අරමුණක් ඇතිවයි. තොරතුරක් ලබා දීම හෝ ලබා ගැනීම, කුතුහලය සමනය කර ගැනීම, වින්දනයක් ලබා ගැනීම වැනි කවර හෝ අරමුණක් එකී සන්නිවේදනය පිටුපස ඇති බව පැහැදිලි ය. තොරතුරු ලබා දෙන පාර්ශවය හා ලබා ගන්නා පාර්ශවය අතර මෙම අරමුණ පිළිබඳ පැහැදිලි අවබෝධයක් ඇත්නම් සන්නිවේදනය සාර්ථක වීමට ඉඩ තිබේ. එහෙත් මේ සම්බන්ධයෙන් පරස්පරතා පවතී නම් ගැටලුකාරී තත්වයක් උද්ගත විය හැකි ය.

* සන්නිවේදනය සංකේතාත්මකය.

සන්නිවේදනය යනු සංකේතාත්මක ක්‍රියාකාරීත්වයකි. තොරතුරක් නැතහොත් සන්දේශයක් යනු සංකේතවලින් සමන්විත වූවකි. මේ අනුව වචන, සංඥා, ලකුණු, මුද්‍රා, ඉඟි, සිතියම්, සිතුවම්, අකුරු පමණක් නො ව සැලකිය යුතු බොහෝ දේය. විවිධ වූ  සංකේත තෝරා ගැනීම ඉතා පරෙස්සමිත් සිදු කළ යුතු කාර්යයකි. කේත සංකේත තෝරා ගැනීම වැරදුණහොත් වෙනත් අර්ථයක් ඇති වී සන්දේශය ව්‍යාකූල වන බවක් දැකිය හැකිය.

*සන්නිවේදනය සන්දර්භානුයත ය.

කවර හෝ සන්නිවේදනයක් සිදු වන්නේ කිසියම් සන්දර්භයක් තුළ යි. මෙමඟින් අදහස් කෙරෙන් අදාළ සන්නිවේදන සිදු වන රටාව නැතහොත් 'පරිසරය' යි. සන්නිවේදන කාර්යය හා සන්දර්භය අතර සෘජු සම්බන්ධතාවක් පවතී. සන්දර්භයට ගැළපෙන ලෙස සන්නිවේදන කාර්යය සකස් විය යුතු වේ. නිදසුනක් ලෙස අවමංගල්‍යය උත්සවයකදී එයට  අදාළ සත්දර්භය අනුව කටයුතු සිදු කර යුතුය.ඊට අදාළ වූ සන්නිවේදනයන් සිදු වන ආකාරය විමසා බැලීමෙන් මෙකී තත්වයන් පැහැදිලි කර ගත හැකි වේ.

*සන්නිවේදනය ක්‍රියාපටිපාටියකි.

සන්නිවේදනය කිසි විටකත් හුදෙකලාව පවතින වෙනස් නොවන දෙයක් නො වේ. එය නිරන්තරයෙන් කාලයත් සමඟ වෙනස් වෙයි. එනිසා ම පන්නිවේදනය පිළිබඳ අධ්‍යයනය කිරීම හුදු භාණ්ඩයක් පිළිබඳ ව අධ්‍යයනය කිරීමට වඩා වෙනස් වූවකි. සන්නිවේදනය පිළිබඳ අධ්‍යයනය කිරීමේ දී ඒ හා සම්බන්ධ තවත් සාධක බොහොමයක් පිළිබඳ ව අවධානය යොමු කිරීමට සිදු වේ.

ඕනෑම සන්නිවේදන අවස්ථාවක කිසියම් ක්‍රියාවලියක් සිදු වේ.එම ක්‍රියාවලිය හා සම්බන්ධ සිතීම, සැලසුම් කිරිම, ලිවීම, සංස්කරණය කිරීම, නැවත ලිවීම ආදි විවිධ අවස්ථා ගණනකින් පසුව අවසන් ප්‍රතිඵලය වෙත එළඹෙයි.

* සන්නිවේදනය විවිධාකාර වේ.

සන්නිවේදන වර්ග හා ස්වරූප පිළිබඳ ව අවධානය යොමු කිරීමෙන් ම එහි විවිධාකාර බව පිළිබඳ මූලික අවබෝධයක් ලබා ගත හැකි වේ. මේ එක් එක් සන්නිවේදන වර්ග හා ස්වරූප විවිධ වූ සන්දර්භයන්හි දී තවදුරටත් විවිධ වෙනස්කම් හා පරිවර්තනයන්ට භාජනය වන බව දක්නට හැක.පුද්ගලාන්තර සන්නිවේදනයට වඩා කණ්ඩායම් සන්නිවේදනය වෙනස් වෙයි. කථන සන්නිවේදනයට වඩා ලිඛිත සන්නිවේදන ස්වරූපය වෙනස් වෙයි. කථන සන්නිවේදන ස්වරූපය ආගමික සන්දර්භයක දී එක ආකාරයකටත් දේශපාලන සත්දර්භයක දි ඊට වඩා වෙනස් ආකාරයකටත් සිදු වෙයි.

තාක්ෂණයේ ආගමනයත් සමඟ පන්නිවේදනය වෙනස්කම් රැසකට බඳුන් වූ බව පැහැදිලිය. අන්තර්වර්තී පුද්ගල සන්නිවේදනය හැරුණු කොට අන් සියලු සන්නිවේදන වර්ග තාක්ෂණය නිසා කලින් කලට විවිධ පරිවර්තනයන්ට ලක් වීම වැළැක්විය නොහැකි සංසිද්ධියක් බවට පත් ව තිබේ.සංස්කෘතිය ද සන්නිවේදනයේ විවිධත්වයට හේතු වන වැදගක් සාධකයක් ලෙස සැලකිය හැකි වෙයි. රට රටවල විවිධ සමාජයන්හි පවතින විවිධාකාර සංස්කෘති හා උපසංස්කෘතීන්හි දක්නට ලැබෙන සන්නිවේදනය ආශ්‍රිත ක්‍රියාකාරකම්වල විවිධතා පිළිබඳ සොයා බැලීමෙන් මෙම තත්වය තේරුම් ගැනීමට පුළුවන.අනෙක් අතට, සංස්කෘතිය ද කාලයත් සමග වෙනස් වන්නකි. එහි වෙනස්කම්වලට අනුරූප වූ සන්නිවේදනයේ ද වෙනස්කම් ඇති විය හැකි ය.

*සන්නිවේදනය ඒක මාර්ගික මෙන්ම ද්වි-මාර්ගික වූවකි.

සන්නිවේදනය ගනුදෙනුවක් බව කීවෙමු. එනම් තොරතුරු ලබා ගැනීමක් කා ලබා දීමෙ යන කාර්යයන් දෙක ම එහි දී සිදු වේ. මෙම ගනුදෙනුවට සම්බන්ධ වන පාර්ශව දෙක ම ඊට සක්‍රිය ව දායක විමෙන් ඉහළ ප්‍රතිඵල අපේක්ෂා කළ හැකි ය. සන්නිවේදන අවස්ථා බහුතරයක් ද්වි-මාර්ගික තත්වයක් පෙන්නුම් කරන බව පෙනේ. එහෙත් ඉඳ හිට මීට වෙනස් වූ ඒක මාර්ගික සන්නිවේදනයන් සිදු වන අවස්ථා ද නැත්තේ නො වේ.

*සන්නිවේදනය බලය වේ.

දැනුම බලය වේ යන්න ප්‍රසිද්ධ කියමනෙකි, දැනුම යන්න බොහෝ දුරට තොරතුරු පදනම් කොට ගත්තකි. දැනුම උත්පාදනයට තොරතුරු සන්නිවේදනය මූලික වෙයි. ඒ අනුව සන්නිවේදනය දැනුම මත ගොඩනැගෙන බලයේ පදනම සන්නිවේදනය යි. අයනක් අතට බලය සහ නායකත්වය අතර ඇත්තේ අවියෝජනීය සබඳතාවකි. නායකයාට සිය කණ්ඩායමේ සහයෝගය අහිමි වූ දාට නායකත්වය අහිමි වෙයි. එනිසා නායකත්වය ලැබීමට හා එය රැක ගැනීමට සෙසු අයගේ පක්ෂපාතිත්වය අත්‍යවශ්‍ය වේ. ඊට අන් අයගේ එකගතාව, අනුමැතිය හා කැමැත්ත දිනා ගත යුතු ය. ඒ සඳහා නායකයා හොඳ සන්නිවේදකයෙකු විය. යුතු ය. පන්නිවේදනය බලය වන බව මෙහි දී ද තහවුරු වෙයි. ආගමික, අධ්‍යාපනික, දේශපාලනික, වාණිජ ආදී කවර ක්ෂේත්‍රයක වුව ද මෙම තත්ත්වය විද්‍යමාන වේ.

                 සටහන : සචීරා සත්සරණි 

                 ජන සන්නිවේදන අධ්‍යයන අංශය

                 කැළණිය විශ්වවිද්‍යාලය 

සන්නිවේදනයේ පදනම

 

සන්නිවේදනය හඳුන ගැනීම

* තොරතුරු හුහුවමාරුව සන්නිවේදනය යි

* මානව සන්නිවේදනය මානව සමාජ සම්භවය තරන්ම  පැරැණි ය.

* සන්නිවේදනය දෛනික ජීවිතය හා සම්බන්ධ වූවකි.

* මානවයෙකු වශයෙන් අප සිදු කරන සිතීම, ස්පර්ශය ආඝ්‍රාණය, දැකීම, කතා කිරීම, විඳීම, කියවීම, ලිවීම, විනෝද වීම ආදී වූ සෑම කාර්යයක්ම සෘජුව හෝ වක්‍රව සම්බන්ධතාවක් දක්වයි.

* පුද්ගල හා සමාජ සම්බන්ධතාවන්ගේ පදනම සන්නිවේදනය යි.

* සන්නිවේදනයය බිඳ වුණු විට ඒ හා බැඳුණු සමස්ත පද්ධතිය ම අඩාල වෙයි.

* යහපත් සන්නිවේදනයක් පවතී නම් එය බොහෝ පුද්ගල සමාජ ගැටලු අවම කර ගැනීමට හේතු වේ.

* එහෙයින් සන්නිවේදනය පිළිබඳ අවධානය යොමු කිරීම, අධ්‍යයනය කිරීම හා ප්‍රගුණ කිරීම වැදගත්ය.

* සන්නිවේදනය යන පදයේ පුළුල් අර්ථය "දැන ගත් දේ දන ගැනීමට සැලැස්වීම" යන්න යි.

* ඉංග්‍රීසි 'communicatim' යන පදය ලතින් භාෂාවේ පොදු බවට පත් කිරීම යන අරුත සහිත "comunis යන මූලයෙන් බිඳී ආවකි.

*සිංහලයේ සන්නිවේදනය යන වචනයෙහි අර්ථය මැනවින් දැනුම් දීම යන්න යි.

* දමිළ භාෂාවෙන් සන්නිවේදනය යන්න 'තොඩර්පාඩල් ' යනුවෙන් හඳුන්වයි. එහි අදහස "සබඳතා පැවැත්වීමේ ක්‍රියාවලිය'' යන්න යි.

*සාමාන්‍ය සන්නිවේදන අවස්ථාවන්හි දී තොරතුර හඳුනා ගැනීම සහ තොරතුරු  හුවමාරුව සඳහා භාවිත කරනු ලබන්නේ පංචේන්ද්‍රියන් ය.

*මිනිසා නිර්මාණය කරගත් භාෂාව හේතුවෙන් වඩාත් සංකීර්ණ අදහස් හා සංකල්ප පිළිබඳ තොරතුරු හුවමාරු කර ගැනීමේ හැකියාව උදා විය.

* භාෂා සම්භවය සමඟ අදහස් හා සංකල්ප පිළිබඳ දැනුම පුළුල් විය.

*ලේඛනය ආරම්භයත් සමඟ තොරතුරු ගබඩාකර කල් තබා ගැනීමට පදනම සකස් විය.

* සන්නිවේදන තාක්ෂණය වැඩි දියුණු වීමේ ප්‍රතිඵලයක් ලෙස තොරතුරු හුවමාරුව කඩිනම් විය.

* ජනමාධ්‍යවල ආගමනයත් සමඟ තොරතුරු රාශියක් විශාල පිරිසක් වෙත එක වර,බෙදා හැරිමේ හැකියාව ලැබිණි.

 

සටහන : සචීරා සත්සරණි 

         ජන සන්නිවේදන  අධ්‍යයනය අංශය

         කළණිය විශ්වවිද්‍යාලය  

                     

සන්නිවේදනය ආරම්භය හා විකාශය

සන්නිවේදනය ආරම්භය හා විකාශය****

(01 පාඩම)

සන්නිවේදනය අත්‍යාවශ්‍ය මානවීය ක්‍රියාවලියකි. පුද්ගල අන්තර් සම්බන්ධතා ගොඩනඟා ගැනීම සඳහා සෑම පුද්ගලයෙකුට ම සන්නිවේදනය අත්‍යවශ්‍ය වේ. සන්නිවේදනය යන්නෙහි සරල අර්ථය වන්නේ හැඟීම් දැනීම්, අදහස් සහ දැනුම යනාදිය හවුමාරු කර ගැනීම යි. ප්‍රාථමික සමාජවල විසූ මිනිසුන් විවිධ ශබ්ද, සංඥා, සංකේත භාවිතයෙන් කළ සරල අදහස් හුවමාරුවේ සිට වර්තමානය වන විට ජනමාධ්‍යය හා අංකිත සන්නිවේදන  තාක්ෂණ මෙවලම් හරහා සිදු කරනු ලබන තොරතුරු හුවමාරුව දක්වා සන්නිවේදන ක්ෂේත්‍රය පුළුල් වී ඇත. නූතනයේ විශ්වය එක ම පවුලක් වන තරමට මානව අන්තර් සම්බන්ධතා සමීප කරවීමට සන්නිවේදනය හේතු වී තිබේ.

සන්නිවේදන ක්‍රියාවලියේ වර්ධනයත් සමඟ ජනමාධ්‍යයන් ඇතුළු විවිධ දියුණු සන්නිවේදන මාධ්‍ය ඔස්සේ සිදු වන අසීමාන්තික තොරතුරු ජනනය, හුවමාරුව හා ව්‍යාප්තිය තනි තනි පුද්ගලයාගේ මනස හා චර්යාව කෙරෙහිත් පුද්ගලයාගේ සමාජීය අන්තර් සම්බන්ධතා කෙරෙහිත් අවසානයේ සමස්ත සමාජය කෙරෙහිත් ප්‍රබල බලපෑමක් ඇති කරනු ලබයි. එය ඉෂ්ට මෙන් ම අනිෂ්ට බලපෑමක් විය හැකි ය. මාධ්‍ය ඔස්සේ අසීමාන්තික ව, විචිත්‍රවත්  ආකෘති ඔස්සේ, සීග්‍රයෙන් ගලා එන තොරතුරු පරිහරණය කිරීමෙන පුද්ගලයා සනිවේදනය සිදු කරයි.හුදෙකලා පුද්ගල ඒකක ලෙස සමාජයේ තනි ව කටයුතු කිරීමට සක්‍රි‍ය පුරවැසියෙකුට නොහැකි ය. 

එසේම පුද්ගලයා සමාජ ජීවියෙකු ලෙස තොරතුරු පරිහරණයෙන් වැළකී සිටීම හෝ ඔහු ව වළකා තැබීම කළ නොහැකි ය. පුද්ගලයාගේ හා සමාජයේ ප්‍රගමණයට අවශ්‍ය තොරතුරු ලබා ගත යුතු ය. මේ සඳහා අවශ්‍ය වන්නේ මාධ්‍යය ඔස්සේ ලබා දෙන තොරතුරු තෝරා බේරා ගෙන පරිහරණය කිරීමේ ඥානය යි. මාධ්‍යය විසින් මවන මායාව හා යතාර්ථය වෙන් වෙන් වශයෙන් හඳුනා ගැනීමට ශක්තිය ඇති කරන පුද්ගලයාට  අවශ්‍ය  වන මාධ්‍යය සාක්ෂරතා ඥානයන් සහ විචාරශීලී ග්‍රාහකයන් ලෙස කටයුතු කිරීමට හැකියාවක් තිබිය යුතුය.

යුනෙස්කෝ සංවිධානය 1982 වසරේ දී ගෲන්වල්ට් ප්‍රකාශනය විසින් හා එහි සමුළු වාර කිහිපයක දී ම මාධ්‍යය යේ අහිතකර බලපෑමෙන් ළමා හා තරුණ පරපුර මුදවා ගත යුතු බව දක්වන ලදී. එහි දී මාධ්‍යය  සාක්ෂරතාවෙන් හා විචාරශීලී ලෙස මාධ්‍ය  පරිහරණය කිරීමේ ඥානයෙන් මෙන් නිර්මාණශීලී චින්තනයෙන් දරුවන් බලසම්පන්න කළ යුතු බව අවධාරණය කරන ලදි. පාසලේ ප්‍රාථමික ශේණියේ සිට මාධ්‍යය අධ්‍යාපන ය ලබා දිය යුතු බවට යුනෙස්කෝ සංවිධානය නිර්දේශ කර සිටියේ ද ඒ අනුවයි. විෂය නිර්දේශයෙහි සංක්ෂිප්ත ව දක්වා තිබූ විෂය කරුණු මෙහි දී විස්තරාත්මක ව ඇතුළත් කර තිබේ.

ඒ අනුව සන්නිවේදනය හා මාධ්‍ය අධ්‍යයනය විෂයය හදාරන ශිෂ්‍ය ශිෂ්‍යාවන් මාධ්‍ය  සාක්ෂරතා ඥානයෙන් හා විචාරශීලී ව මාධ්‍ය  පරිහරණය කිරීම පිළිබඳ අවබෝධයෙන් යුක්ත සක්‍රීය සන්නිවේදකයන් මෙන් ම පුරවැසියන් වීම අත්‍යාවශ්‍ය  ය. ඒ සඳහා මෙම විෂයයෙහි විෂය අන්තර්ගතය පෙළ ගස්වා ඇත. 

සන්නිවේදන අධ්‍යයනය ශාස්ත්‍රීය ය විෂයයක් ලෙස හැදෑරීම ආරම්භ වූ ආකාරය, එහි වර්ධනය, සන්නිවේදන විෂයය ශ්‍රී ලංකාවේ අධ්‍යාපන පද්ධතියට හඳුන්වා දීම සහ විෂයය හැදෑරීමේ වැදගත්කම හා අවශ්‍යතාව පිළිබඳ අවබෝධය ලබා දීම මෙම  ඒකකය මඟින් සිදු වේ. එමඟින් සන්නිවේදනය හා මාධ්‍යයේ අධ්‍යාපනය විෂයය හැදෑරීමට අවශ්‍ය  පදනම ශිෂ්‍ය ශිෂ්‍යාවන් වෙත ලබා දීම අපේක්ෂා කෙරේ.

සන්නිවේදන අධ්‍යයනයයෙහි ආරම්භය, විකාශය හා ඉගෙනීමෙහි වැදගත්කම 

•සන්නිවේදනයේ  මානව අන්තර් සම්බන්ධතාව අතර ඇත්තේ අවියෝජනීය සම්බන්ධතාවකි. මිනිසා මිහිමත ජීවත් වීම ආරම්භ කළ දිනයේ සිට මානව සන්නිවේදනය ක්‍රියාත්මක වේ. 

      

• ප්‍රාථමික සමාජයන්හි විසූ ජනයා සිය සරල ජීවන අවශ්‍යතා ඉටු කර ගැනීම සඳහා විවිධ සංඥා, ශබ්ද, සංකේත භාවිත කරමින් ආරම්භ කළ අදහස් ප්‍රකාශනය අද වන විට දියුණු සන්නිවේදන තාක්ෂ ණික මෙවලම් ඔස්සේ සිදු වන ඉතා සංකීර්ණ ක්‍රියාදාමයක් බවට පත් ව තිබේ.

• සන්නිවේදන තාක්ෂණයේ දියුණුව, ජනමාධ්‍යයන්ගේ වර්ධනය මාධ්‍ය  මඟින් සමාජය වෙත කළ බලපෑමේ ස්වභාවය සන්නිවේදන අධ්‍යයන ක්ෂේත්‍රයේ ස්වාධීන විෂයයක් ලෙස වැඩීමටත්, ගැඹුරින් අධ්‍යයනය කිරීමටත් ප්‍රධාන වශයෙන් හේතු විය. 

•සන්නිවේදන අධ්‍යයනයෙහි ප්‍රධාන අරමුණ වන්නේ මානව අත්දැකීම්වල කේන්ද්‍රීය සාධකය ලෙස සන්නිවේදනය ක්‍රියාත්මක වන ආකාරය පිළිබඳ හැදෑරීමයි.

•මෙහි දී මානව අත්දැකීම් යන්නට සන්දේශ නිර්මාණය, හුවමාරු කර ගැනීම, ඒවා අර්ථකතනය කිරීමේ දී ජනතාව හැසිරෙන, ක්‍රමය කරන ආකාරය කෙසේ ද? යන්න අවබෝධ කර ගැනීම ඇතුළත් වේ.

    

• සන්නිවේදනය යන්න මිනිසාගේ ආරම්භය තෙක් දිවයන ක්‍රියාවලියක් වුවත් එය ශාස්ත්රීනය විෂය ක්ෂේත්‍රයක් ලෙස අධ්‍යනය කිරීම කෙරෙහි ලෝකයේ අවධානය යොමු වන්නේ 20 වන සියවසේ මුල් භාගයේ දී ය.     

•කාර්මික විප්ලවය, පළමුවන හා දෙවන ලෝක යුද්ධ හේතුවෙන් සන්නිවේදන තාක්ෂලණයේ සිදු වූ ශීඝ්‍ර  දියුණුව ජනමාධ්යය බිහි වීම, වර්ධනය හා ව්‍යාප්තිය කෙරෙහි බලපෑවේ ය. මෙම තත්වය සන්නිවේදන විෂයය පිළිබඳ අධ්‍යයනය කිරීමේ උනන්දුව හා අවශ්‍යතාව ඉහළ නැංවී ය.

• ලෝක යුද්ධ අවසන් වීමෙන් පසු යුද්ධ තොරතුරු වාර්තා කිරීම හා හුවමාරු කිරීම සඳහා භාවිත කළ මාධ්‍ය ජනතාව වෙනුවෙන් විනෝදාස්වාදය හා තොරතුරු සම්පාදනය කිරීමට යොදා ගන්නා ලදි.

     

•යුද්ධයෙන් පීඩාවට පත් ව සිටි ජනතාවගේ බිඳ වැටුණු මානසිකත්වය ඉලක්ක කර ගනිමින් මාධ්‍ය  ඔස්සේ සරල විනෝදය ගෙන දෙන ත්‍රාසය, භීතිය, වීරත්වය හා ලිංගිකත්වය මතු කරන ආකාරයේ ටෙලි නාට්‍යය, චිත්‍රපට, පුවත්පත්, ගීත ආදිය බහුල ලෙස සම්පාදනය කරනු ලැබිණ. 

•මෙකල වාණිජ පරමාර්ථයෙන් මෙන් ම බලය ලබා ගැනීමේ හා තහවුරු කර ගැනීමේ අපේක්ෂාවෙන් ද මාධ්‍ය  හිමිකරුවන් විසින් හා දේශපාලන නායකයන් විසින් අත්තනෝමතික ලෙස ජනමාධ්‍යය භාවිතයට ගනු ලැබ ඇත. 

• මේ සෑම ආකාරයෙන් ම මාධ්‍යය මඟින් සමාජය වෙත එල්ල කළ තියුණු බලපෑම විසින් සන්නිවේදන ක්ෂේත්‍රය පිළිබඳ ශාස්ත්‍රීය වශයෙන් අධ්‍යනය කිරීමට විද්වත්තු පොලඹවනු ලැබූහ.

•ඒ අනුව එක් දහස් නවසිය විසි ගණන්වල දී විවිධ විෂය ක්ෂේත්රොයන්හි ශික්ෂණය ලබා තිබූ විශේෂඥ දැනුමෙන් යුතු විද්වත්හු ඔවුන්ගේ පර්යේෂණ අනාවරණ මඟින් එවක ක්‍රියාත්මක වූ ජනමාධ්‍යය පුද්ගලයා කෙරෙහි හා පුද්ගල සමාජ සම්බන්ධතා කෙරෙහි බලපෑමක් ඇති කරන බව තහවුරු කළහ.

 

• සන්නිවේදන විෂයය “සන්නිවේදන අධ්‍යයනය ” නමින් ස්වාධීන විෂය ක්ෂේත්‍රයක් ලෙස හැඳින්වීමට පෙර එය ප්‍රධාන විෂයයන් තුනක් වන මනෝවිද්‍යාව, සමාජ විද්‍යාව හා දේශපාලන විද්යායව යන ශික්ෂපණවේදයන්හි අන්තර්ගත විය. 

•සමාජ විද්‍යා ක්ශේත්‍රයේ  චාල්ස් කූලී, දේශපාලන විද්‍යා ක්ෂේත්‍රයේ වෝල්ටර් ලිප්මාන් මෙන්ම  ජෝන් ඩුවී යන විද්වතුන්ගේ අදහස් හා පර්යේෂණ අධ්‍යයන විසින් සන්නිවේදන අධ්‍යයනය  ශාස්ත්‍රීය විෂයයක් ලෙස වර්තමාන තත්වයට පත් කිරීමට අවශ්‍ය   පදනම සකස් කරනු ලැබිණ.

*චාල්ස් කූලි (1864-1929) 

*වෝල්ටර් ලිප්මාන් (1889-1974) 

 *ජෝන් ඩුවී (1859-1952) 

චාල්ස් කූලී ‘සමාජ සංවිධානය’ කෘතිය ද  වෝල්ටර් ලිප්මාන් ‘ජනමතය’ කෘතිය ද ජෝන් ඩුවී ‘ජනතාව හා ඔවුන්ගේ ගැටලු කෘතිය ද සම්පාදනය කරමින් දැක්වූ අදහස් සෞන්දර්ය කලා විශ්ව විද්‍යාලය,ව්‍යවහාරික සංගීත හා ජන සන්නිවේදන අධ්‍යයන අංශය. ක්ෂේත්‍රය සංවර්ධනය කළේ ය.

 

• මානව සම්බන්ධතා පවත්වා ගැනීමේ හා වර්ධනය කිරීමේ යාන්ත්‍රණය  සන්නිවේදනය බව චාල්ස් කුලී විග්‍රහ කරන අතර මෙම විද්වත්හු තිදෙනා ම පුද්ගලයාගේ සමාජ ජීවිතයේ වැදගත් ම කේන්ද්‍රීකරණ සාධකය සන්නිවේදනය ලෙස හඳුන්වා දෙති. 

• වෙනස් වන හා දියුණුවන මාධ්‍ය  තාක්ෂණය සංස්කෘතිය කෙරෙහි ඇති කරන බලපෑම,

සන්නිවේදනය, ප්‍රජාතන්ත්‍රවාදය හා ප්‍රජාව යන කරුණු අතර ඇති සම්බන්ධතාවෙන් මතු වන සමාජ ගැටලු පිළිබඳ මෙම විද්වත්හු තව දුරටත් කරුණු ඉදිරිපත් කළහ. මෙම අදහස් සන්නිවේදනය ශාස්ත්‍රීය  විෂයයක් ලෙස අධ්‍යයනය  කිරීමට අවශ්‍ය  පදනම සකස් කරන ලදි. 

•මෙයින් පසු සන්නිවේදන අධ්‍යයනය  ශාස්ත්‍රීය  විෂයයක් ලෙස ස්ථාපනය වීම යුරෝපීය සහ අමෙරිකානු විද්වතුන් රැසකගේ පුරෝගාමීත්වයෙන් අමෙරිකාව කේන්ද්‍රකර ගනිමින් සිදු ව ඇත. සන්නිවේදන අධ්‍යයනය තව දුරටත් වෙනත් විෂයයන්හි අන්තර්ගත වූ විෂයයක් ලෙස නො ව ස්වාධීන විෂයය ක්ෂේත්‍රයක් ලෙස වර්ධනය වීම සිදු විය. 

•1933 වසරේ සිට 1945 පමණ දක්වා ජර්මනියේ ක්‍රියාත්මක  වූ ඇඩොල්ෆ් හිට්ලර්ගේ ඒකාධිපති පාලනය යටතේ එරට විශ්ව විද්‍යාල වලින් පිටමං කරනු ලැබූ විද්වත්හු විශාල ප්‍රමාණයක් අමෙරිකා එක්සත් ජනපදයට සංක්‍රමණය  වූහ. ඔවුහු අමෙරිකානු විශ්වවිද්‍යාලය කේන්ද්‍ර කර ගනිමින් සන්නිවේදන ක්ෂේත්‍රය පිළිබඳ විවිධ ශාස්ත්‍රීය  අධ්‍යයනයන්හි නිරත වූහ. 

•හැරල්ඞ් ඩී. ලැස්වෙල්, කර්ට් ලෙවින්, පෝල් ලැසාස්ෆෙල්ඞ්, කාල් හව්ලන්ඞ්, විල්බර් ශ්‍රාම්, ජෝර්ජ් ගාබ්නර් වැනි විද්වතුන් විසින් ද ක්ලෝඞ් ශනොන් සහ වොරන් වීවර් යන ඉංජිනේරු විෂය ක්ෂේත්‍රයේ විද්වතුන් ද විසින් සන්නිවේදන  අධ්‍යයනයයෙහි ශාස්ත්‍රීය  සංවර්ධනයට අවශ්‍ය  පදනම සකස් කරන ලදි.

• 1940 දශකයේ දී මහාචාර්ය විල්බර් ශ්‍රාම් විසින් සන්නිවේදන අධ්‍යයනය ශාස්ත්‍රීය  විෂය ක්ෂේත්‍රයක් ලෙස ආයතන ගත කිරීමට පියවර ගන්නා ලදි. ඒ අතර ජනමාධ්‍ය  පාසල්, සන්නිවේදන පර්යේෂණ ආයතන ස්ථාපිත කිරීම හා විශ්වවිද්‍යාල සඳහා නව අධ්‍යයනය  අංශ ආරම්භ කිරීම පෙන්වා දිය හැකි ය. 

•සන්නිවේදන අධ්‍යයනය ශාස්ත්‍රීය  විෂයයක් ලෙස ඉගැන්වීම ආරම්භ කළ පළමු විශ්වවිද්‍යාලය  ලෙස ඉලිනොයිස් විශ්වවිද්‍යාලය  හඳුන්වා දිය හැකි ය.

• කාර්මික විප්ලවය, පළමු වන සහ දෙවන ලෝක සංග්‍රාම හේතුවෙන් තාක්ෂණික වශයෙන් ජනමාධ්‍යයන්ගේ වර්ධනයත් බහුල වීමත් සිදු විය. 

•පළමුවන හා දෙවන ලෝක සංග්‍රාමයන්හි දී  මෙන් ම ඇඩෝල්ෆ් හිට්ලර් වැනි පාලකයන් ද මාධ්‍ය   හිමිකාරිත්වය දැරූ ව්‍යාපාරිකයන්  ද විසින්  විවිධ ප්‍රචාරණ  හා ප්‍රවර්ධන කටයුතු සඳහා සන්නිවේදන මාධ්‍ය   යොදා ගැනීම සහ එහි අහිතකර ප්‍රතිතිවිපාක සමාජය කෙරෙහි ඇති කළ බලපෑම විද්වතුන් සන්නිවේදන  ක්ෂේත්‍රය පිළිබඳ ව විශේෂ අවධානයක් යොමු කිරිමට ප්‍රබල ලෙස හේතු විය. 

• 1960 දශකයේ මුල් භාගයේ දී සමාජ විද්‍යාව, දේශපාලන විද්‍යාව, මනෝ විද්‍යාව  සහ ඉංග්‍රීසි  භාෂාව ආදි විෂය ක්ෂේත්‍රය තුළ අන්තර්ගතව තිබූ සන්නිවේදන අධ්‍යයනය  ස්වාධීන විෂය ක්ෂේත්‍රයක් ලෙස වෙන ම අධ්‍යයනය  කිරීම ආරම්භ විය. 

•ජනමාධ්‍ය  මඟින් ඉදිරිපත් වූ සන්දේශ සහ මාධ්‍යයන්ගේ ක්‍රියායකාරීත්වය ජන ජීවිතයේ සියලු දේ කෙරෙහි බලපෑම් ඇති කිරීමට හේතු වන බව 60, 70 දශකවල සන්නිවේදන ක්ෂේත්‍රයේ විද්වතුන් විසින් සිදු කරන ලද පර්යේෂණ අධ්‍යයන  මඟින් අනාවරණ කර ගන්නා ලදි.

•විශේෂයෙන් රූපවාහිනි මාධ්‍ය  දරුවන් කෙරෙහි ඇති කරන බලපෑම පිළිබඳ මහාචාර්ය විල්බර් ශ්‍රාම් වැනි විද්වතුන් සහ විශ්වවිද්‍යාල  පර්යේෂණ කණ්ඩායම් විසින් සිදු කළ පර්යේෂණ අධ්‍යයනයන්හි අනාවරණ ගැඹුරින් සාකච්ඡාවට ලක් විය. 

•මහාචාර්ය විල්බර් ශ්‍රාම් විසින් රුපවාහිනී මාධ්‍ය  පිළිබඳ සිදු කළ ප්‍රථම පර්යේෂණ වාර්තාව ඉදිරිපත් කරමින් ප්‍රකාශ කර සිටියේ ළමයින්ගේ සමාජ සම්බන්ධතා දුරස් වීම හා රුපවාහිනි භාවිතය අතර සම්බන්ධතාවක් පවතින බවයි.  දෙමව්පියන් සමඟ අඬදබර කරගන්නා දරුවන් තම නොරිස්සුම් සහගත හැඟීම්වලින් පලා යාමට, සිත් වේදනාවන් අමතක කර ගැනීමට රූපවාහිනිය නැරඹීමට යොමු වන බව තවදුරටත් වාර්තාවෙන් කරුණු ඉදිරිපත් කළේය.

• පෙන්සිල්වේනියානු විශ්වවිද්‍යාල පර්යේෂණ කණ්ඩායම විසින් ප්‍රචණ්ඩ ක්‍රියා සහිත හා රහිත කාටුන් වැඩසටහන් ළමයින් කණ්ඩායම් දෙකකට නැරඹීමට අවස්ථාව ලබා දී සිදු කළ පර්යේෂණය මහාචාර්ය විල්බර් ශ්‍රාම් සිය පර්යේෂණය මඟින් ඉදිරිපත් කළ කරුණු තහවුරු කිරීමට සමත් විය. 

•මෙහි දී පෙන්සෙල්වේනියානු විශ්ව විද්‍යාල පර්යේෂණ කණ්ඩායම් රූපවාහිනියේ  ප්‍රචණ්ඩ ක්‍රියා සහිත වැඩසටහන් නැරඹීම නිසා ළමයින් තුළ ප්‍රධාන වශයෙන් වෙනස්කම් තුනක් සිදු වන බව පෙන්වා දෙන ලදී.

1. වේදනාත්මක දේ පිළිබඳ සංවේදිතාව අඩු වීම.

2. දරුවන් ඔවුන් ජීවත්වන පරිසරය හා අවට ලෝකය පිළිබඳ බියක් ඇති කර ගැනීම

3. අන් අය සමඟ කටයුතු කිරීමේ දී ආක්‍රමණශීලී වන්නටත් ඉක්මනින් ආරවුල් ඇති කරගන්නටත් දරුවන් තුළ නැඹුරුව වැඩි වීම. 

•මෙම පර්යේෂණ අධ්‍යයන   හේතුවෙන් සන්නිවේදන අධ්‍යයන ක්ශේත්‍රය  තව දුරටත් සංවර්ධනය විය.

•1960 සහ 70 දශක වන විට ජනමාධ්‍ය  විසින් සමාජ වෙත එල්ල කළ බලපෑම 80 සහ 90දශකවල අංකිත තාක්ෂණික මාධ්‍ය  මෙවලම් භාවිතයට පැමිණීම සහ වර්තමානය වන විට නව  මාධ්‍ය, සමාජ මාධ්‍ය වල ක්‍රියාකාරිත්වය සන්නිවේදන අධ්‍යයනය ක්ශේත්‍රයේ යේ විෂය පථය තවදුරටත් පුළුල් කිරීමට හේතු වී ඇත.

 

•සන්නිවේදනය විෂයය සජීව මෙන් ම සක්‍රීය විෂය ක්ෂේත්‍රයකි. සන්නිවේදන තාක්ෂණයේ නැගීමත් සමඟ අතීතයේ සිට එය වර්ධනය වී ඇත. එසේ ම වර්තමානයේ සහ අනාගතයේ ද  මෙම විෂයය සන්නිවේදන තාක්ෂේණයේ දියුණුව, නවීන සන්නිවේදන මෙවලම් හා ඒවා භාවිතයේ ස්වභාවය සහ එමඟින් සමාජය වෙත කරනු ලබන බලපෑම අනුව වෙනස් වන අතර ඉදිරියේදී ද වෙනස් වේ. 

 ■ සන්නිවේදන අධ්‍යයනය ක්ශේත්‍රය පිළිබඳ ශාස්ත්‍රීය  වශයෙන් අධ්‍යයනය කිරීමෙන්, 

 

01 ජාතික සහ ජාත්‍යන්තර වශයෙන් සන්නිවේදන ක්‍රියාදාමය හා මාධ්‍ය ක්‍රියාකාරීත්වය  පිළිබඳ අවබෝධය ඇති වීම.

02 විචාරශීලී ව මාධ්‍ය  පරිහරණය කිරීමේ කුසලතා වර්ධනය වීම.

03 අවශ්‍ය , අදාළ තොරතුරු තෝරා ගැනීමේ හැකියාව. 

04 ගවේෂණශීලීභාවය, විචාරශීලි චින්තනය දියුණු වීම.

05 මාධ්‍ය  සාක්ෂරතාව වර්ධනය වීම.

06 යහපත්, ආචාරශීලී හා ඵලදායී මානව අන්තර් සම්බන්ධතාව ඇති වීම.

07 සමාජ ප්‍රගමණය සඳහා සක්‍රීය දායකත්වය සැපයීම.

08 නිර්මාණාත්මක චින්තනය හා මාධ්‍ය  සන්දේශ නිර්මාණය වීම.

09 සංවර්ධනාත්මක හා ප්‍රජාතන්ත්‍රවාදී  චින්තනයෙන් පෝෂණය වූ පුරවැසියෙකු වීමට අවශ්‍ය  දැනුම, ආකල්ප, කුසලතා හා පුරුදු ඇති වීම.

10 ජන මාධ්‍ය ආයතනයන්හි ක්‍රියාකාරීත්වය  පිළිබඳ අවබෝධය පුද්ගලයෙකු තුළ ගොඩනැංවේ.

සටහන : සචීරා සත්සරණි 

         ජන සන්නිවේදන අධ්‍යයන අංශය

         කැළණිය විශ්වවිද්‍යාලය